ಯಾವುದು ಇಲ್ಲಿ ಶಾಶ್ವತ?

ಯಾವುದು ಇಲ್ಲಿ ನಮ್ಮ ಸ್ವಂತ?

ಈ ಬದುಕೆನ್ನುವುದೇ ಒಂದು ರೋಚಕ!

ಮುಂದೇನಾಗುವುದೋ ಎಂಬುದು ಪ್ರಶ್ನಾರ್ಥಕ ?

ಈ ಕ್ಷಣವನ್ನು ಅನುಭವಿಸುತ,

ನಗು ಪ್ರೀತಿಯನು ಹಂಚುತ

ಬದುಕೋಣ ನಮ್ಮ  ಈ ಜೀವಿತ...

ಈ ಬದುಕಲಿ ಗೆಲುವು

 ತುಂಬಿದೆ ನೀನು

ತೋರುತಾ ಒಲವು

ಈ ಕಣ್ಣಲಿ ಕನಸು

ಮನಸಲಿ ಹುರುಪು

ತಂದಿಹೆ ನೀನು

ಜೊತೆಯೇ ನೀನಿರಲು ಹೀಗೆ

ನಿನ್ನ ಜೊತೆಯಾಗಿ ನಾ ನಿಲ್ಲುವೆ 

ನನ್ನ ಹಾಡು, ನನ್ನ ಪಾಡು

ನನ್ನ ಬದುಕೇ ನೀನು ಎಂದಿಗೂ...

 ಮನಸ್ಸು ಎಂಬ ಅಂಗಳಕ್ಕೆ 

ನೆಮ್ಮದಿ ಎಂಬ ರಂಗವಲ್ಲಿ ಬಿಡಿಸುತ್ತಿದೆ

ಅದೆಲ್ಲಿಂದಲೋ ಕಷ್ಟ ಎಂಬ ಬಿರುಗಾಳಿ ಬೀಸಿ

 ಎಲ್ಲವನ್ನೂ ಅಳಿಸಿ ಹಾಕಿದೆ

 ಚಿಂತೆಗು ಚಿಂತೆಯಾಗುವಂತೆ ಮರೆ ನಿನ್ನ ಚಿಂತೆಗಳ !

ಮರೆವಿಗು ನೆನಪಾಗದಂತೆ ಮರೆ ಎಲ್ಲ ಚಿಂತೆಗಳ !

ಅಮ್ಮ

 ಅಮ್ಮ ಎಂದರೆ ನನ್ನಮ್ಮ

ನಿನಗಾರು ಸಾಟಿ ಇಲ್ಲಮ್ಮ

ಪ್ರತಿ ಜನುಮದಲ್ಲು ನಾನೇ ನಿನ್ನ ಕಂದಮ್ಮ

ಸಾವಿರ ಜನುಮಕು ನೀನಾಗಬೇಕು ನನ್ನ ಹೆತ್ತಮ್ಮ

ನನಗಾಗಿ ನೀನೆಷ್ಟು ಶ್ರಮಿಸುವೆ

ನನಗೆ ನೋವಾದರೆ ನೀನಳುವೆ

ನನ್ನ ಖುಷಿ ನೋಡಿ ನೀ ನಗುವೆ

ನನಗೆ ಒಳಿತಾಗಲಿ ಎಂದು ಬಯಸುವೆ

ನೀ ಮಾಡುವೆ ನನಗೆ ಸಹಾಯ

ಹೋಗಲಾಡಿಸುವೆ ನನ್ನ ಭಯ

ನನ್ನ ನಿನ್ನ ನಡುವೆ ಪ್ರೀತಿಯ ವಿನಿಮಯ

ಸದಾ ಹೀಗೆ ಇರಲಿ ನಮ್ಮ ಈ ಬಾಂಧವ್ಯ

ಆ ದೇವರು ಹೇಗಿದ್ದಾನೋ ನಾ ಅರಿಯೆನೆ

ನನ್ನ ಪಾಲಿನ ದೇವತೆ ನೀನೇನೆ

ನಾ ಸದಾ ಪ್ರೀತಿಸುವೆ ನಿನ್ನನ್ನೇ

ನೀನಿರದೆ ನಾ ಬರಿ ಶೂನ್ಯನೇ

ನನ್ನ ಜೀವನ ನಿನಗೆಂದೆ ಅರ್ಪಿತ

ನಾ ಬಯಸುವೆ ನಿನ್ನ ಹಿತ

ನಾನೆಂದಿಗೂ ನಿನ್ನ ಸ್ವಂತ

ಅಮ್ಮ ನೀನಿರು ಸದಾ ನಗುನಗುತಾ

ಚಹಾ

 

 ಚಿತ್ರಕೃಪೆ - ಅಂತರ್ಜಾಲ

ಪ್ರತಿ ದಿನ ಆರಂಭವು ನಿನ್ನೊಂದಿಗೆ

ಸೋಲುವುದು ನಾಲಿಗೆ ನಿನ್ನ ರುಚಿಗೆ

ಪರಿಹಾರವು ನೀ ನೋವಿಗೆ

ನಿತ್ಯ ಉಪಹಾರವು ನಿನ್ನೊಂದಿಗೆ

ಜೊತೆಯಾಗಿರುವೆ ಒಂಟಿ ಬದುಕಿಗೆ

ಉಲ್ಲಾಸ ತುಂಬುವೆ ಮನಸಿಗೆ

ನಿನ್ನಿಂದ ಈ ಮೊಗದಲಿ ಕಿರುನಗೆ

ಮಿತವಾದ ಹಿತವಾದ

ಸಿಹಿಯಾದ ಸವಿಯಾದ

ಆ ಸ್ವಾದ

ಆಸ್ವಾದಿಸಲು ಆನಂದ

ಅಮ್ಮ

ನಿನಗೆ ನೋವಾದರೆ ಅಳುವಳು ಅವಳು

ನಿನ್ನ ಕಣ್ಣೀರ ಒರೆಸುವ ಕೈಗಳು ಅವಳದು

ಸದಾ ನಿನಗೆ ಒಳಿತನ್ನೇ ಬಯಸುವಳು

ಬಲು ಮುಗ್ದ ಮನಸು ಅವಳದು

ಎಂದೆಂದೂ ನಿನಗಾಗಿಯೇ ಬದುಕುವಳು

ಕಪಟ ಪ್ರೀತಿಯ ಎಂದಿಗೂ ತೋರಳು

ಅಪ್ಪಟ ಬಂಗಾರದ ಮನಸಿನ ಗುಣದವಳು

ಐಶ್ವರ್ಯ

 

ಐಶ್ವರ್ಯವನ್ನು ಗಳಿಸುವುದು ಕಷ್ಟ 

ಉಳಿಸಿಕೊಳ್ಳುವುದು ಕಷ್ಟ

ವ್ಯಯ ಮಾಡುವುದಷ್ಟೇ ಸುಲಭ

ಕಷ್ಟದಿಂದ ಒಲಿಯುತ್ತದೆಯೋ

 ಅದೃಷ್ಟದಿಂದ ಒಲಿಯುತ್ತದೆಯೋ

ಅದರ ಇಷ್ಟದಂತೆ ಒಲಿಯುತ್ತದೆಯೋ

ಹೇಗೆ ಒಲಿದರು ಅದನ್ನು ಹಾಗೇ

 ಉಳಿಸಿಕೊಳ್ಳುವುದು ಮಾತ್ರ ಕಷ್ಟ

ಕನಸಿನ ದೋಣಿ

 

ಪಯಣ ಶುರು ಆಗಿದೆ ಕನಸಿನ ದೋಣಿಯಲ್ಲಿ
ಸಿಲುಕಿದೆ ಇಂದು  ಕಷ್ಟಗಳ ಸಾಗರದಲ್ಲಿ
ನಿನ್ನಯ ಕನಸಿನ ದೋಣಿಗೆ
ನಾವಿಕನು ನೀನೇ ಅಲ್ಲವೇ
ಭರವಸೆ ಬೇಕಿದೆ ನಿನಗೆ
ನಿನಗೆ ನೀನೇ ಧೈರ್ಯವೇ
ಮರೆಯುತ ಎಲ್ಲಾ ನೋವ
ಸೇರುವೆಯಾ ಆ ದೂರ ತೀರವ

ಈ ಗೆಳೆತನ

ಮೊಗದಲ್ಲಿ ತರಿಸಿದೆ ನಗು

ಬಾಳಲ್ಲಿ ಮೂಡಿಸಿದೆ ರಂಗು

ನೋವುಗಳ ಮರೆಸಿ

ಭರವಸೆಯ ಮೂಡಿಸಿ

ಪ್ರೀತಿಯು ಅಪಾರ

ನಂಬಿಕೆಯೇ ಆಧಾರ

ಪ್ರತಿದಿನ ಸ್ನೇಹ ಸಂಗಮ

ಆದರೆ ಬಲು ಸಂಭ್ರಮ

ನಿಜವಾದ ಸ್ನೇಹ ನಿರಂತರ!

ನಗಬಾರದೇ ಒಮ್ಮೆ

 ಹೇಳು ಮನವೆ ನೀ ಹೇಳು 

ಮುಗಿಯದೇ ನಿನ್ನ ಗೋಳು 

ಸದಾ ಏತಕೆ ಈ ಚಿಂತೆ 

ನಗಬಾರದೇ ಪುಟ್ಟ ಮಗುವಂತೆ

ಸುಂದರ ಚಂದಿರ

 ನಾ ಕೂತಿದ್ದೆ ಕಿಟಕಿ ಬಳಿ 

ಬೀಸುತ್ತಿತ್ತು ತಂಪು ತಂಗಾಳಿ

ನಗುತಿರುವನು ಚಂದಿರ ಬಾನಿನಲ್ಲಿ

ಮಿನುಗುವ ನಕ್ಷತ್ರಗಳ ನಡುವಿನಲ್ಲಿ 

ಗೆಳೆತನ

 ಗೆಳೆತನ

ಅತಿ ಮಧುರವಾದ ನಂಟು ಈ ಗೆಳೆತನ
ಹೇಗಾಯಿತು ನಿನ್ನ ಜನನ ಅರಿಯೆನು ನಾ
ನಿನ್ನಿಂದಾಗಿ  ಈ ಬಾಳಲ್ಲಿ ಹೊಸತನ
ನೀನೇನು ಮಾಯಾವಿಯಾ!
ಗೆಳೆತನದ ಬಲೆಗೆ ಬೀಳದವರು ಯಾರಿಲ್ಲ
ಈ ನಂಟಿಗೆ ಬೆಲೆ ಕಟ್ಟಲಾಗುವುದಿಲ್ಲ
ಗೆಳೆತನಕ್ಕಿಂತ ಮಿಗಿಲಾದುದು ಬೇರೇನಿಲ್ಲ
ಗೆಳೆತನ ಬಾಳಿಗೆ ಸಿಹಿ ಕೊಡುವ ರಸಗುಲ್ಲ!
ನಂಬಿಕೆ ಜೊತೆಗಿದ್ದರೆ ಈ ಸ್ನೇಹ ಶಾಶ್ವತ
ಅನುಮಾನ ಜೊತೆಯಾದರೆ ನಾಶ ಖಂಡಿತ

ಮನಸು ಬಯಸುವ ನಿಧಿ - ನೆಮ್ಮದಿ

ನೆಮ್ಮದಿ!

ಉಕ್ಕಿ ಹರಿಯುವಷ್ಟು ದುಃಖ ಮನಸಿನಲಿ

ಆದರು ಹಸನ್ಮುಖಿ ಎಲ್ಲರ ಎದುರಿನಲಿ
ಹೀಗಿದ್ದರೂ ಮನಸು ಬಯಸುತ್ತಿರುವುದು
ಸುಖವನಲ್ಲ  ಹೊರತಾಗಿ ನೆಮ್ಮದಿಯನ್ನು

 ಈ ಮನಸಿಗೆ ಪೆಟ್ಟಾಗಿದ್ದು 

 ಹುಚ್ಚು ಮಾತಿಂದ ಅಲ್ಲ

ನಿನ್ನ ಚ್ಚುಚ್ಚು ಮಾತಿಂದ

ನಾ ಮೌನಿ ಆಗಿದ್ದು 

ಮಾತು ಬಾರದೆ ಅಲ್ಲ

ನಿನ್ನ ಮಾತು ಸಹಿಸದೆ 

🙂

ಭಾವನೆಗಳಿಗೆ ಭಾವುಕವಾಗುವ  ಮನಸುಗಳು
ಭಾವುಕವಾಗಿ ಬದಲಾಗಿರುವ ಭಾವನೆಗಳು

ಮಾತಿಲ್ಲದೆ ಮೌನವಾದ ಸಂಭಾಷಣೆಗಳು
ಮೌನದಿಂದಲೇ  ಮಾಯವಾದ ಮಾತುಗಳು

ಕನಸು ನನಸಾಗುವಂಥ ಕಲ್ಪನೆಗಳು
ಕಲ್ಪನೆಯಾಗಿಯೇ ಉಳಿಯುವ ಕನಸುಗಳು

ದಾಸವಾಳ

ಇವತ್ತು ಬೆಳಗ್ಗೆ ಹನಿ ಹನಿ ಮಳೆ ಸುರಿಸುತ್ತಿತ್ತು ನಾನು ಹಾಗೆ ಸುಮ್ಮನೆ ಮನೆಯಿಂದ ಆಚೆ ಬಂದು ತೋಟದ ಕಡೆಗೆ ಹೋದೆ. ಹಾಗೆ ಸುಮ್ಮನೆ ದಾಸವಾಳ ಗಿಡದ ಕಡೆಗೆ ಕಣ್ಣು ಹಾಯಿಸಿದೆ, ದಾಸವಾಳ ಹೂವುಗಳು ಅರಳಿ ಕಂಗೊಳಿಸುತ್ತಿದ್ದವು. ಮಳೆ ಹನಿಗಳು ಆ ದಳಗಳ ಮೇಲೆ ಹರಡಿತ್ತು. ನೋಡಲು ಅದೆಷ್ಟು ಸುಂದರವಾಗಿತ್ತು! ನಾನು  ಕೈಯಲ್ಲಿದ್ದ ಫೋನ್ ತಗೊಂಡು ಹಾಗೆ ಒಂದಷ್ಟು ಫೋಟೋ ಕ್ಲಿಕ್ ಮಾಡಿದೆ.

ಎಷ್ಟು ಸುಂದರ ಈ ದಾಸವಾಳ 

ಮಳೆ ಹನಿಯಲಿ ಕಂಗೊಳಿಸಿದೆ ದಳ

ಇದರ ಬಣ್ಣವು ಕೆಂಪು 

ನೋಡಿದ ಈ ಕಣ್ಣಿಗೆ ಕಂಪು! 

ಆ ಗುಲಾಬಿಯಂತೆ

ಈ ಜೀವನ ಗುಲಾಬಿ ಹೂವಿನ ತೋಟದಂತೆ 

ನಾವು ಸುಂದರ ಗುಲಾಬಿ ಹೂವುಗಳು

ಸುಖ ಎಂಬ ಮಳೆಯಲ್ಲಿ ಮಿಂದು ಬೆಳೆಯಬೇಕಾದರೆ

ಕಷ್ಟ ಎಂಬ ಬಿರುಗಾಳಿಗೆ ಸಿಲುಕಲೇಬೇಕು

ಅವಮಾನ ಅನುಮಾನ ಎಂಬ ಸುಡು ಬಿಸಿಲಿಗೆ ಮೈ ಒಡ್ಡಿ ನಿಲ್ಲಬೇಕು

ನಿನ್ನ ಹಿತೈಷಿಗಳಿಗೆ ಕೋಮಲ ದಳವಾಗು

ಶತ್ರುಗಳಿಗೆ ತಿರುಗೇಟಿನ ಮುಳ್ಳಾಗು

ಭಕ್ಷಕನ ಭಯ ಬೇಡ ನಿನಗೆ 

ಕಣ್ಣಿಗೆ ಕಾಣದ ರಕ್ಷಕ ಇದ್ದಾನೆ ಈ ಬಾಳಿಗೆ

ಬದಲಾವಣೆ - ಬವಣೆ - ಭಾವನೆ

ಬದಲಾಗುತ್ತಿರುವ ಕಾಲದೊಂದಿಗೆ ಬದಲಾಗಿದೆ ಎಲ್ಲವು

ಬದಲಾಗಿರುವ ಬದಲಾವಣೆಗಳಿಂದ ಬದಲಾಗದೆ ಇರುವುದು ಯಾವುವು

ಬದಲಾವಣೆಯಿಂದ ಬವಣೆಯೊ

ಬವಣೆಯಿಂದ ಬದಲಾವಣೆಯೊ

 ಬದಲಾವಣೆ ಬವಣೆಗಳ ನಡುವೆ

ಬದಲಾಗದೆ ಉಳಿದಿದ್ದು ಭಾವನೆಗಳು ಮಾತ್ರ

ಮನಸ್ಸು

ಮನಸಿನ ಭಾಷೆ ಮೌನ

 ನೆಮ್ಮದಿಯೇ ಧ್ಯಾನ

ಭಾವನೆಗಳೇ ಕವನ 

ಕಲ್ಪನೆ ಆಲೋಚನೆಗಳ ತಾಣ

ಕನಸಿನೆಡೆಗೆ ಅದರ ಪಯಣ

ನೋವು ನಲಿವುಗಳೆ ನಿಲ್ದಾಣ

 

ಸ್ನೇಹ ಪ್ರೀತಿಯ ತೀರ 

ನಿನ್ನೆಯ ನೆನಪುಗಳೆ ಭಾರ

ನಾಳೆಗೆ ಭರವಸೆಗಳೆ ಆಧಾರ